أشوف نسانا اليوم واصلي على النبي
اللي أمرنا نحجب النسوان
مضمون خراب البيت على يد صاحبته
اللي لازمها كل يوم فستان
فستان صباحي سبور في السوق تلبسه
ساعة ما تطلع تشتري بدنجان
وللضحى فستان رمادي مشجر
نشرت جرائدنا عليه اعلان
والضهر لها فستان يزين قوامها
نهار ما تعزم عالغدا اعيان
والعصر له فستان لزوم (الحديقه)
عشان تكايد به غصون البان
وللمسا فساتين ما اقدرش اعدها
تفتح لتاجر في البلد دكان
ولكل فستان -قال- جزمه وشنطه
وقبعه كانت على المانيكان
وللربيع فساتين توافق زهوره
وياما في زهر الربيع ألوان
وللخريف فساتين غوامق مويره
توافق الحران والبردان
والصيف ، ولبس الصيف مايوهات مشكله
تملأ شناطي وزنها أطنان
أدفع يا جوز الست كامل مرتبك
واسرق وغالط وارتشي انت كمان